Հայերեն
Azərbaycan dili
English
ქართული
Русский
მედიაჰოლდინგი “შენი” გამორჩეული სილამაზით დაჯილდოვებულ ჟურნალისტსა და ტელეწამყვანს თაკო კორინთელს ესაუბრა.
რა გზა განვლო ტელე ეკრანზე გამოჩენამდე; რამდენად ხშირად იცვლის იმიჯსა და რას ფიქრობს მასზე გავრცელებულ ბოლო დროინდელ ჭორებზე – ვრცლად წაიკითხავთ ინტერვიუში:
– თაკო, გაეცანი ჩვენს მკითხველს…
-მე ვარ თაკო კორინთელი, 32 წლის. პროფესიით ჟურნალისტი, გახლავართ დაოჯახებული.
-რომელი წლიდან გამოჩნდი პირველად ეკრანზე და როგორ დაიწყო შენი კარიერა?
-ჩემი პირველი გამოჩენა, სავარაუდოდ, საზოგადოებას არ ემახსოვრება იმიტომ, რომ ვიყავი ძალიან პატარა, ალბათ 14- 15 წლის, როდესაც გადამიღეს ერთ ერთ სარეკლამო რგოლში. ეს იყო ჩემი პირველი გაელვება ეკრანზე. ჩემი კარიერა დაიწყო, ალბათ, უფრო მას შემდეგ, როდესაც უნივერსიტეტში ჩავაბარე. პარალელურად დავიწყე რადიოში მუშაობა, ასე იწყება ჩემი პროფესიული განვითარება, რამოდენიმე წელი ვიმუშავე რადიოში და შემდეგ გადავედი ტელევიზიაში. ვიყავი ერთ-ერთ არხზე საინფორმაციო გადაცემის წამყვანი…
– გაგვიზიარე შენი სამსახიობო გამოცდილებაც…
-სხვათაშორის, პროფესიას როდესაც ვირჩევდი, ან სამსახიობოზე მინდოდა ან ჟურნალისტიკაზე. თუმცა არჩევანი შევაჩერე ჟურნალისტიკაზე. ბავშვობიდან სულ მიკროფონი მეჭირა, სულ ვთამაშობდი, რომ ვითომ ვიყავი წამყვანი… მახსოვს პირველად ბავაშვობაში მიკროფონი რომ მიყიდეს, სადენიანი და ე.წ მაგნიტაფონზე შესაერთებელი, მეგონა, რომ ვიყავი ცხოვრებაში ყველაზე ბედნიერი.
რაც შეეხება სამსახიობო გამოცდილებას, თუ არ ჩავთვლით კლიპებს, რეკლამებს რომლებშიც ვიღებდი მონაწილეობას, ყველაზე მასშტაბური ჩემი გამოჩენა ეკრანზე, იყო ” ჩემი ცოლის დაქალებში” ბარბარიკას როლზე. ძალიან კარგად მახსენდება. იყო ძალიან კომფორტული ჩემთვის. ყოველ გადაღებაზე რაღაც ახალს აღმოვაჩენდი საკუთარ თავში. მინდა აღვნიშნო, დღესაც ბევრს ჰგონია, რომ ვარ მსახიობი და ბევრი მომიხსენიებს, როგორც მსახიობ თაკო კორინთელს. ეს სიმართლეს არ შეესაბამება, პროფესიით ვარ ჟურნალისტი.
– როგორც ვიცი, ხშირად მოგზაურობ, მეუღლესთან ერთად. თქვენი ყველაზე გამორჩეული ადგილი რომელია? და ბოლოს სად იმოგზაურეთ?
-ხშირად ვმოგზაურობთ ნამდვილად. ბოლოს ვიყავით თურქეთში, სტამბულში. ძალიან ხშირად დავდივართ ჩემი ქმრის პროფესიიდან გამომდინარე, (თაკო კორინთელის მეუღლე გახლავთ ლევან ნარეშელი, ექიმი რეაბილიტოლოგი, ფიზიკური თერაპევტი ) სტამბულში გვიწევს ხშირად ჩასვლა და ჩვენი ერთ-ერთი საყვარელი ადგილი სწორედ სტამბულია. ძალიან ბევრი მოგონება, ისტორია და თავგადასავალი გვაკავშირებს სტამბულთან. ამიტომ გამორჩეულად გვიყვარს. თუმცა ეს არის ერთ- ერთი ჩვენი საყვარელი ადგილი და არა ერთადერთი. (იცინის)
– ხშირად ხარ ჭორისა და განხილვის საგანი?
– არ ვფიქრობ, რომ სულ ეპიცენტრში ვარ, ან სულ განხილვის საგანი ვარ. თუმცა არის ხოლმე რაღაც პერიოდები… თუნდაც ახლა ბოლოს, ჩემი თმის გადაპარსვის ამბავს დიდი გამოხმაურება მოჰყვა. თუმცა მიხარია, რომ 99% ძალიან დადებითად და პოზიტიურად შეხვდა ამ ცვლილებას. თუმცა იყო რამოდენიმე შემთხვევა პირად შეტყობინებაში ძალიან არაადეკვატურად მწერდნენ და მეკითხებოდნენ – რა მჭირდა?… (იცინის) ზოგადად არ ვპასუხობ ასეთებს, მაგრამ ამჯერად წამიცდა ხელი და ვუპასუხე კიდეც. ანუ არ მაქვს უფლება, სტილი შევიცვალო? თმა გამოვაჯანსაღო? (იცინის) აქამდეც მახსენდება კიდევ რამოდენიმე შემთხვევა, ძირითადად პირად მიმოწერაში მწერდნენ და მავიწროვებდნენ წონის გამო. ძალიან მწყინდა არამკითხე მოამბეებისგან. ადამიანები თავს აძლევდნენ უფლებას პირად მიმოწერაში ძალიან უტაქტოდ ეკითხათ წონაზე და ა.შ. ეს იყო შეურაცხმყოფელი. რაღაც დროის მერე გამოვიმუშავე, უკვე მეცინება ასეთებზე.
–მართლაც დიდი გამოხმაურება გამოიწვია შენმა ახალმა იმიჯმა, მიიღე კომპლიმენტი ჩვენი მთელი კოლექტივის სახელით, საოცრად გშვენის. ხშირად იცვლი იმიჯს?
-კი მართლა ისეთი ამბავი ატყდა! მთელი დღე ჟურნალისტები მირეკავენ და კითხვა ყველას ერთი აქვს. იმიტომ რომ თემა ერთია… იმიჯს ხშირად არ ვიცვლი და აქამდე რადიკალური ცვლილებები ფაქტობრივად არ მქონია. მაგრამ ახლა გადავწყვიტე ასე – გამოვაჯანსაღე თმა. გამიზნულად არ გადამიწყვეტია. ასე გამოვიდა, რასაც მოჰყვა დიდი გამოხმაურება და დადებითი შეფასებები საზოგადოებისგან.
–რას ურჩევდით ადამიანებს, რომლებსაც თქვენსავით თვალისმომჭრელი და წარმატებული საეკრანო კარიერა სურთ – ჰქონდეთ?
– ვერ ვიტყვი, რომ ძალიან თვალისმომჭრელი და წარმატებული ვარ, ჩემზე ბევრად ლამაზები და წარმატებულები არიან ჩემს ირგვლივ და ჩემს თავსაც ვერ მივცემ უფლებას, სხვა დავმოძღვრო და რჩევები გავცე, თუმცა ვინც ახლა იწყებს, ირჩევს ამ პროფესიას, მეგობრულად ვურჩევდი, რომ აუცილებლად ბევრი იშრომეთ, ყველა პროფესიაში და განსაკუთრებით ჟუნალისტიკაში მნიშვნელოვანი არის განწყობა, მუხტი და ენერგია. ასევე მნიშვნელოვანია, რომ დაისახოთ მიზანი და ამ მიზნისკენ სულ წინ იაროთ.
ავტორი – თამარ ფიცხელაური.
გაიგეთ მეტი ჩვენს ტელეგრამ არხზე შემოგვიერთდით ტელეგრამზე: https://t.me/SheniEkimi
მასალის გამოყენების პირობები
