ცურვა აკაჟებს ორგანიზმს, ხელს უწყობს თერმორეგულაციის მექანიზმთა სრულყოფას, აძლიერებს იმუნიტეტს, აუმჯობესებს გარემოსთან ადაპტაციის უნარს, ამაღლებს ზოგად ტონუსსა და გამძლეობას, ხელს უწყობს ზრდასა და წონის კლებას, ავითარებს სასუნთქ აპარატსა და კუნთოვან სისტემას, ამაგრებს ძვლოვან სისტემას, განამტკიცებს ნერვული და გულ-სისხლძარღვთა სისტემების ფუნქციას. მას, ვინც რეგულარულად ცურავს, ჯანსაღი ძილი, კარგი მადა და გაწონასწორებული ნერვული სისტემა აქვს.
ცურვისას პრაქტიკულად არ იტვირთება სახსრები და ხერხემალი. ამიტომაც ხერხემლის პათოლოგიებით დაავადებულთათვის ცურვა განსაკუთრებით სასარგებლოა. ციკლური ვარჯიშის ამ სახეობას წარმატებით იყენებენ ხერხემლის დაავადებათა კომპლექსური მკურნალობისას. ისინი, ვისთვისაც ხმელეთზე სპორტული დატვირთვა მტკივნეული და სახიფათოა, მშვიდად და შედარებით კომფორტულად ვარჯიშობენ წყალში.
ერთადერთი პრობლემა, რაც შეიძლება ცურვამ გამოიწვიოს, არის თვალის წვა, სიწითლე და გამოშრობა. საქართველოში აუზების უმრავლესობას ქლორით ასუფთავებენ და სერიოზული გაფილტვრა არც ისე ხშირად ხდება, რადგან ეს ძვირად ღირებული პროცესია. ქლორს თავისი უარყოფითი თვისებები აქვს – განსაკუთრებულად, თვალებთან დაკავშირებით – თვალის წვა და სიწითლე. ამიტომ უმჯობესია, თუ აუზზე სიარულის დაწყებისთანავე დაიწყებთ თვალის დაცვას და მის გამორეცხვას.
აუცილებლად გამოყავით რამდენიმე დღე ცურვისათვის და ხელი შეუწყვეთ საკუთარ თავს უფრო მეტად გააკაჟოთ სხეული და იყოთ ჯანმრთელად.კარგი იქნება თუ ინსტრუქტორსაც აიყვანთ და მიჰყვებით მის რჩევებს, ეს უფრო დაგეხმარებათ სიჯანსაღისა და სიმსუბუქის შენარჩუნებაში.
წყარო: https://sportall.ge/
