11/03/2022
ის, რაც უკრაინაში ხდება, მსოფლიოში ყველა ადამიანს ეხება. ეს თითოეულის პრობლემა და გამოწვევაა, მნიშვნელობა არა აქვს, მდიდარია თუ ღარიბი, მორწმუნეა თუ ათეისტი, – ამის შესახებ ჯანდაცვის სფეროს ექსპერტი გიორგი ფხაკაძე სოციალურ ქსელში წერს.
პოსტს „პრაიმთაიმი“ უცვლელად გთავაზობთ:
„პირველი, რაც ახლა საქართველოსთვის აუცილებელია – ქვეყანას სჭირდება ერთი ლიდერი, რომლის ირგვლივ ხალხი გაერთიანდება; ადამიანი, რომელიც იდგება პოლიტიკაზე მაღლა; ადამიანი, რომელიც იქნება არა პოლიტიკისთვის, არამედ ქვეყნისთვის, სახელმწიფოსთვის და მის ირგვლივ ყველა უნდა გაერთიანდეს;
სამწუხაროდ, წლებია, საქართველოში ერთი ლიდერის გარშემო კონსოლიდაცია ვერ მოხერხდა. ხალხი ერთმანეთს ვჭამთ, ვებრძვით, ენერგიებს არასწორად ვხარჯავთ. არსად ჩანს სიყვარული, სითბო, ერთობა.
ახლა რთული დროა. თუ გვინდა, გადავრჩეთ, როგორც ადამიანები, როგორც ერი, თუ გვინდა, ქართული სიტყვა ჟღერდეს ქვეყნის შიგნით და გარეთ, ჩვენ ერთად უნდა ვიყოთ;
ერთობა არის ჩვენი სიძლიერე. შეხედეთ უკრაინას. მას ერთიანობა გადაარჩენს. ერთიანობა რომ არა, სამ დღეში ყველგან რუსული დროშა იფრიალებდა და უკრაინულად ლაპარაკი ყველას აეკრძალებოდა. მაგრამ უკრაინა მედგრად დგას, იბრძვის და ის გაიმარჯვებს;
საქართველოს ახლა ერთიანობა ისე სჭირდება. როგორც არასდროს. ყველა, ვინც ამ ერთობის წინააღმდეგია, ქვეყნის მტერია.
რა შეიძლება გავაკეთოთ? არსებული ლიდერებიდან იდეალური არავინაა, პოლიტიკური პარტიები ამდენ ხანს ვერ მორიგდნენ. ჩემი აზრით, ერთადერთი ბოლო ბერკეტი, რაც დარჩა, ეს არის ქალბატონი პრეზიდენტი – სალომე ზურაბიშვილი.
მე პირადად არ ვიცნობ ქალბატონ სალომეს. გარკვეულ საკითხებთან დაკავშირებით, რამდენჯერმე რბილად გავაკრიტიკე კიდეც, მაგრამ, ამავე დროს, არაერთხელ გადავუხადე დიდი მადლობა სწორი პოზიციისთვის.
გახსოვთ, ვაქცინაციასთან დაკავშირებით რომ პრობლემები იყო, მე ხელისუფლებას მოვუწოდე, საჯაროდ აცრილიყვნენ და ხალხისთვის მაგალითი მიეცათ. პირველი, ვინც საჯაროდ აიცრა და საზოგადოებასაც სწორი მესიჯები გაუგზავნა, ქალბატონი პრეზიდენტი გახლდათ. მე მაშინ მას საჯაროდ დიდი მადლობა გამოვუცხადე.
ბოლო ორი წლის მანძილზე, კრიტიკულ სიტუაციებში, ქალბატონმა სალომემ არაერთი სწორი ნაბიჯი გადადგა, როგორც პრეზიდენტმა. მე მას არ ვიცნობ, ხმაც არ მიმიცია მისთვის, რადგან არჩევნების დროს საქართველოში არ ვიყავი, მაგრამ სიტუაციის შეფასებისას რეალობა ესაა, რასაც გიყვებით – ქვეყანას სჭირდება ლიდერი და ქალბატონი პრეზიდენტი არსებული პოლიტიკური სპექტრიდან ყველაზე სწორად იქცევა;
არც ერთ პოლიტიკურ პარტიას მხარს არ ვუჭერ, ყველა მხრიდან უამრავი შეცდომა იყო, მაგრამ პირადი ამბიციები დღეს ყველამ გვერდზე უნდა დადადოს, რადგანაც ქვეყნის გადასარჩენად ერთიანობაა საჭირო.
პანდემიის დროს პრეზიდენტი ადეკვატურ ნაბიჯებს დგამდა: აიცრა, სამედიცინო პირბადესაც იყენებდა, საზოგადოებასაც სწორი მესიჯებით მიმართავდა. ჩემთვის, როგორც სამედიცინო ექსპერტისთვის, პრეზიდენტის გადაწყვეტილებები იყო ევროპული, სწორი და სტანდარტული. ასევე, ის ძალისხმევა, რაც ევროკავშირთან მიმართებაში გააკეთა, იყო სწორი და გაბედული. დანარჩენი – არ ვიცი, მე პოლიტიკოსი არ ვარ, მაგრამ ვხედავ, რომ გადასარჩენად ერთობა გვჭირდება;
ლოდინის დრო არ გვაქვს, გადაწყვეტილებები ახლაა მისაღები. ამოვიდა ყელში „ნაცობა“ და „ქოცობა“. პოლარიზაცია ქვეყანას ღუპავს. ჩვენ გვყავს ორი მტერი: კორონა და რუსეთი; არც ერთი არსად არ წასულა – გვებრძვის და ეს ორი რთული პრობლემა ერთიანობით უნდა მოვაგვაროთ;
ხალხი ბრძენია, ეს ჩანს. ახლა პოლიტიკოსებმა მიიღეთ ადეკვატური გადაწყვეტილება – გაერთიანდით ერთი ლიდერის ირგვლივ და ეს ქვეყანა ყველამ ერთად გადავარჩინოთ.
კიდევ ერთიც – სანამ მიტინგზე წახვალთ, შეირბინეთ პოლიკლინიკაში და ბუსტერი გაიკეთეთ, გამოიყენეთ სამედიცინო პირბადე, დისტანცია მაქსიმალურად დაიცავით. კოვიდი არ გამქრალა, ისევე, როგორც რუსეთის იმპერიული, ფაშისტური ძალა. მათ ერთად უნდა შევებრძოლოთ. ჯანმრთელობას გისურვებთ. მე მჯერა, რომ ძალა ერთობაშია, მჯერა, რომ გავიმარჯვებთ, მჯერა, რომ უკრაინა გაიმარჯვებს. Слава Украiнi,“ – წერს გიორგი ფხაკაძე.
Professor Giorgi Pkhakadze, MD, MPH, PhD
#drpkhakadze #გიორგიფხაკაძე #accreditationge
Профессор Гиорги Пхакадзе. #ПрофессорПхакадзе
https://youtube.com/@drpkhakadze
Prepared by: ირინა დათაშვილი #datashvil
წყარო: https://primetime.ge/news/sazogadoeb/kovidi-ar-gamqrala-iseve-rogorts-rusetis-imperiuli-dzala-giorgi-fkhakadze
