ყელი, ისევე, როგორც ხელები, პირველი გასცემს ქალის ასაკს. ამიტომ მას განსაკუთრებით სათუთი მოვლა სჭირდება. ხალხურ კოსმეტოლოგიაში უამრავი რეცეპტი არსებობს, რომელიც ყელის მოვლაში დაგეხმარებათ.
ლიმონი ელასტიკურობის შესანარჩუნებლად
ყელის კანის სიმკვრივისა და ელასტიკურობის შესანარჩუნებლად კვირაში ერთხელ ყელი, გულ-მკერდი და მხრები ნახევარ ლიტრ წყალში გაზავებული ერთი ლიმონის წვენით დაიზილეთ. შემდეგ, როცა სითხე კანზე შეშრება, მსუბუქი მასაჟისებური მოძრაობით მკვებავი კრემი წაისვით.
მკვებავი და დამატენიანებელი ნიღაბი
1 სადილის კოვზი ზეითუნის ზეთი ან სხვა ზეთი, 1 ჩაის კოვზი თაფლი და 1 უმი კვერცხის გული კარგად აურიეთ. მიღებული ნაზავი წაისვით დეკოლტესა და ყელზე და 15-20 წუთის შემდეგ თბილი წყლით ჩამოიბანეთ.
თუ, უბრალოდ, დატენიანება გსურთ, გამოიყენეთ უმი კვერცხის გული, თაფლისა და ზეთის გარეშე.
ნიღაბი ნაოჭების წინააღმდეგ
ერთ ჩაის კოვზ სელის თესლს დაასხით ნახევარი ჭიქა მდუღარე წყალი და ნელ ცეცხლზე 10 წუთით ადუღეთ. შემდეგ გადმოდგით, თავზე დაახურეთ. როცა ოდნავ შეგრილდება, გადაწურეთ და ჯერ კიდევ თბილი, ლორწოვანი ნახარში ყელზე წაისვით. 20-25 წუთის შემდეგ თბილი წყლით ჩამოიბანეთ.
თუ შინ სელის ზეთი მოგეპოვებათ, შეგიძლიათ ის ყელისთვის ნაოჭების საწინააღმდეგო ნიღბის სახით გამოიყენოთ. სელის ზეთი ოდნავ შეათბეთ, წაისვით ყელზე და 20-25 წუთით გაიჩერეთ.
მკვებავი და გამწმენდი ნიღაბი
2 სადილის კოვზ შვრიის ფქვილს დაასხით თბილი რძე – იმდენი, რომ ცოტა სქელი ცომი მიიღოთ. შეათბეთ, დაუმატეთ ერთი ჩაის კოვზი კარაქი. თუ რძის ნაღები გაქვთ, შეგიძლიათ, ისიც დაუმატოთ – 1 ჩაის კოვზი. ყველაფერი კარგად აურიეთ და დეკოლტესა და ყელზე წაისვით. 15 წუთის შემდეგ ნიღაბი თბილი წყლით ჩამოიბანეთ.
წყარო: https://marao.ge/
#drpkhakadze #shenisilamaze #gochadze
