იცოდით, რომ ქალებს დაორსულება მენსტრუალური ციკლის პერიოდში მხოლოდ 9 დღის განმავლობაში შეუძლიათ? თუკი დავადგენთ, როდის გვაქვს ეს კრიტიკული 9 დღე, შეგვიძლია, არასასურველი ორსულობა თავიდან ავირიდოთ.

საბედნიეროდ, ამის დადგენა ტემპერატურის გაზომვით, ციკლის მონიტორინგითა და ვაგინალურ გამონადენზე დაკვირვებით შეგვიძლია. კონტრაცეფციის ამ მეთოდს ე.წ. „ნაყოფიერების მონიტორინგი“ (ინგლ. Fertility awareness; იგივე Natural Family Planning — ოჯახის დაგეგმვის ბუნებრივი მეთოდი) ჰქვია და თუკი ყველაფერს სწორად გავაკეთებთ, ის 99%-ით ეფექტურია. სტატიაში სწორედ კონტრაცეფციის ამ მეთოდს გაგაცნობთ.

მენსტრუალური ციკლი და ოვულაცია

ქალის მენსტრუალური ციკლი საშუალოდ 28 დღე გრძელდება. მენსტრუაციამდე, როგორც წესი, 10-16 დღით ადრე თქვენი ერთ-ერთი საკვერციდან მომწიფებული კვერცხუჯრედი გამოიდევნება და ფალოპის მილში ხვდება — ამას ეწოდება ოვულაცია. ხანდახან აქედან 24 საათში მეორე საკვერცხიდან მეორე კვერცხუჯრედიც გამოდის.

კვერცხუჯრედი ოვულაციიდან მაქსიმუმ 24 საათი ცოცხლობს. იმისათვის, რომ დავორსულდეთ, ამ პერიოდში კვერცხუჯრედს სპერმა უნდა შეხვდეს. დაორსულება შესაძლებელებია ოვულაციის დაწყებიდან 2 დღის განმავლობაში. თუმცა, ვინაიდან სპერმას შეუძლია, რომ ქალის სხეულში 7 დღე იცოცხლოს, დაორსულების ალბათობა არსებობს იმ შემთხვევაშიც, თუ ოვულაციის დაწყებამდე 7 დღის განმავლობაში გქონდათ სექსი.

^{წყარო: Femea}

როგორ მუშაობს კონტრაცეფციის ბუნებრივი მეთოდი?

იმისთვის, რომ დავადგინოთ, როდის ხდება ოვულაცია, 3-6 მენსტრუალური ციკლის მანძილზე მაინც უნდა დავაკვირდეთ 3 სიგნალს. გაითვალისწინეთ, რომ სიგნალებზე გავლენა შეიძლება იქონიოს ავადმყოფობამ, სტრესმა და მოგზაურობამ. ეს სიგნალებია:

1. მენსტრუალური ციკლის სიგრძე

სასურველია, დეტალურად ჩაინიშნოთ ციკლის დაწყებისა და დასრულების თარიღი. შეგიძლიათ, გამოიყენოთ მობილური აპლიკაციები.

2. ტემპერატურა

ოვულაციის შემდეგ სხეულის ტემპერატურა ოდნავ (0.2 გრადუს ცელსიუსით) მატულობს. გაიზომეთ ტემპერატურა ყოველ დილით ერთსა და იმავე დროს, ადგომამდე. თუ 3 დღის მიყოლებით ტემპერატურა უფრო მაღალი აღმოჩნდა, ვიდრე წინა 6 დღის განმავლობაში, დიდი ალბათობით, თქვენ აღარ შეგიძლიათ დაორსულება.

3. საშვილოსნოს ყელის გამონადენის მონიტორინგი

მენსტრუალური ციკლის მსვლელობისას იცვლება გამონადენის რაოდენობა და ტექსტურა.

მენსტრუაციიდან პირველი რამდენიმე დღე თქვენი ვაგინა გამომშრალია და გამონადენიც არ არის. სხეული ოვულაციისთვის მზადებას რომ იწყებს, შეიძლება, შეამჩნიოთ სველი, წებოვანი, თეთრი, კრემისებრი გამონადენი. ამ დროს იწყება თქვენი ნაყოფიერი პერიოდი.

ზუსტად ოვულაციამდე გამონადენი ხდება უფრო სველი, გამჭვირვალე და სლიკინა, კვერცხის ცილის მსგავსი. ამ პერიოდში ყველაზე მაღალი შანსია დაორსულების.

გამონადენი მალევე დაუბრუნდება უფრო სქელ, წებოვან მასას და 3 დღის შემდეგ დაორსულება ისევ ვეღარ უნდა შეძლოთ.

^{სურათზე: ფოლიკულური ფაზა; ოვულაცია; ლუთეინური ფაზა. წყარო: Invitra}

^{მარცხნივ: არაფერტილური (უნაყოფო) გამონადენი. მარჯვნივ: ფერტილური (ნაყოფიერი) გამონადენი. წყარო: Carrot-Top}

დადებითი მხარეები

• არ იწვევს გვერდით მოვლენებს;

• ქალების უმეტესობას შეუძლია თავის ამგვარად დაცვა, თუ აქვთ სწორი ინფორმაცია ექიმისგან;

• არ საჭიროებს ქიმიური წარმოების ან ფიზიკურ პროდუქტებს;

• გეხმარებათ, შეამჩნიოთ ანომალიები გამონადენში.

უარყოფითი მხარეები

• არ იცავს სქესობრივად გადამდები დაავადებებისგან;

• ნაყოფიერ პერიოდში სექსისგან გიწევთ თავის არიდება ან კონტრაცეფციის სხვა მეთოდების გამოყენება;

• თუკი მეთოდს ზუსტად არ გამოიყენებთ, ის შეიძლება, ნაკლებად ეფექტური იყოს, ვიდრე სხვა მეთოდები;

• ამ მეთოდის გამოყენება არაა რეკომენდებული, თუ გაქვთ არარეგულარული ციკლი, თუ ცოტა ხნის წინ შეწყვიტეთ ჰორმონალური კონტრაცეფციის მიღება, თუ ცოტა ხნის წინ გაიკეთეთ აბორტი ან მოგეშალათ ნაყოფი, თუ ხშირად მოგზაურობთ, თუ ბევრ ალკოჰოლს მოიხმართ ან თუ არ შეგიძლიათ ტემპერატურის გაზომვა;

• იმისთვის, რომ ზუსტად დაადგინოთ ნაყოფიერი პერიოდი, სიგნალების მონიტორინგი რამდენიმე ციკლის განმავლობაში უნდა მოახდინოთ და ნიშნები ყოველდღიურად ჩაინიშნოთ;

• თუკი დალევთ პოსტკოიტალურ (სექსის შემდგომ) კონტრაცეპტივს (ე.წ. „გადაუდებელ კონტრაცეფციას“), მოგიწევთ, კონტრაცეფციის ბუნებრივ მეთოდს ორი თვე არ მიმართოთ.