ქვის როლერი რამდენიმე წლის წინ გამოჩნდა ბაზარზე და დღესაც პოპულარულია. ის, ტრადიციისამებრ, ნეფრიტისგან მზადდება, თუმცა ბროლის, ამეთვისტოს და ვარდისფერი კვარცის ნაკეთობებსაც შეხვდებით.
თამამად შეგიძლიათ, როლერი თავის მოვლის ყოველდღიურ რუტინაში ჩართოთ. მასაჟის გაკეთება დღეში რამდენჯერმე შეიძლება და ძალიან ეფექტურია ნებისმიერი მიზეზით – უძილობით, ალერგიით, მარილის სიჭარბით – გამოწვეული შეშუპების დროს.
ასაკის მატებასთან ერთად კანი კისერსა და მკერდზეც დუნდება, ამიტომ მასაჟის დროს ნურც ყელისა და დეკოლტეს არეებს დაივიწყებთ.
მნიშვნელოვანია, გორგოლაჭი მხოლოდ ერთი მიმართულებით – ქვემოდან ზემოთ, სიმძიმის ძალის საპირისპიროდ – ამოძრაოთ.
როლერის გამოყენება ნებისმიერი ტიპის კანისთვის შეიძლება. მთავარია, სწორად გამოვიყენოთ.
როლერი ამოძრავეთ ერთი მიმართულებით და არა ზემოთ-ქვემოთ.
შუბლზე: ჯერ ვერტიკალურად, წარბიდან თმისკენ, მერე – ჰორიზონტალურად, შუა ხაზიდან საფეთქლისკენ.
თვალის გარშემო: ჯერ – ყვრიმალის გასწვრივ, თვალის შიდა კუთხიდან საფეთქლისკენ, მერე – ქუთუთოზე, ასევე საფეთქლისკენ.
ცხვირზე: წვერიდან წარბებისკენ
ლოყებზე: ნიკაპის შუა ხაზიდან ყვრიმალის გავლით საფეთქლებისკენ; საულვაშიდან საფეთქლებისკენ.
ნიკაპზე: დაიდეთ როლერი ტუჩსა და ნიკაპს შორის და ნელა აგორავეთ ქვედა ყბის გასწვრივ ყურისკენ.
დასასრულ – საფეთქლებიდან ქვემოთ, ლიმფური კვანძებისკენ.
როლერი ყოველი გამოყენების შემდეგ კარგად გარეცხეთ გამდინარე წყლით.
გუა შა ჩინური მასაჟის უძველესი მეთოდია. ის ბრტყელი, გლუვი ქვით სრულდება, რომელსაც დაახლოებით ისეთივე ეფექტი აქვს, როგორიც როლერს: ააქტიურებს სისხლისა და ლიმფის მიმოქცევას, ზრდის კანის ელასტიკურობას, ამცირებს აკნეს, მიმიკურ ნაოჭებს, ამკვრივებს მოშვებულ კანს.
ამ მეთოდს მარტო დაბერების საწინააღმდეგო ეფექტი არ აქვს – სამხრეთ და აღმოსავლეთ აზიაში მას დღესაც აქტიურად იყენებენ ზურგის, კისრის, მხრების, თავის ტკივილის სამკურნალოდ.
მასაჟის დაწყებამდე კანი ნუშის, ქაცვის, ჟოჟობას ან სხვა კოსმეტიკური ზეთით დაიმუშავეთ. ქვა ირიბად დაიჭირეთ და წიბოთი მსუბუქად დაისვით კანზე. თუ კანი ოდნავ გაწითლდა, ნუ შეგეშინდებათ, პირიქით, უკეთესია. მასაჟი შეგიძლიათ 5-10 წუთიც გააგრძელოთ.
მაგალითად, თვალის გარშემო სიშავისა და შეშუპების დროს როლერი ჯობია, თუმცა საბოლოო არჩევანი მაინც თქვენზეა: ის გამოიყენეთ, რომელიც უფრო გსიამოვნებთ.
წყარო: https://www.aversi.ge/ka/
