მედიაჰოლდინგ “შენის” მორიგი რესპონდენტი ამჯერად სუსტი სქესის ძლიერი წარმომადგენელი MMA-ის მებრძოლი ბორენა ცერცვაძეა.
როგორ ახერხებს, იყოს ლამაზი და მომხიბვლელი და თან ამავდროულად მებრძოლი ქალი. რა დროს ატარებს სპორტდარბაზში და როგორ ამსხვრევს სტერეოტიპებს? ამ ყველაფერს ინტერვიუდან შეიტყობთ:
–გაეცანით ჩვენს მკითხველს..
– მე ვარ ბორენა ცერცვაძე 31 წლის. პროფესიით იურისტი გახლავართ, ასევე ვარ სპორტსმენი. პროფესიონალურ სპორტში 27 წლის ასაკიდან ვარ.
– გვიამბეთ, როგორ დაიწყო თქვენი სპორტული კარიერა და როგორ მიხვედით იმ გადაწყვეტილებამდე, რომ თქვენი ცხოვრება პროფესიონალურ სპორტს დაუკავშირეთ?
– ყოველთვის აქტიური ცხოვრებით ვცხოვრობდი და სიახლეები მიყვარს, ამიტომ გადავწყვიტე ჩემი შესაძლებლიბები გამომეცადა. ტრენერმაც მომცა სტიმული, რომ შევძლებდი. როგორც უკვე აღვნიშნე, 27 წლის ასაკიდან ვარ პროფესიონალურ სპორტში. 2020 წელს მოვიგე საქართველოს ჩემპიონატი ძალისმიერ სპორტში. შემდეგ, სამი თვე რაგბის ვთამაშობდი და ამის შემდეგ ჩავები შერეულ ორთაბრძოლებში. MMA- ში, სადაც დღემდე ვარ დაკავებული. სულ მინდოდა სპორტში ვყოფილიყავი, და როდესაც ცხოვრებაში მომეცა ამის საშუალება, შანსი გამოვიყენე.
– როგორ მიიღეს ეს ოჯახის წევრებმა – მხარი დაგიჭირეს,თუ იყო წინააღმდეგობა?
– რაც შეეხება ოჯახის წევრებს, წინააღმდეგები იყვნენ. ზოგადად, საზოგადოებაში გავრცელებული შეხედულებით, ქალს არ შეეძლო ძალისმიერ სპორტში წასვლა და მსგავსი პროფესიის ქონა. ჩემი ძმა ერთი თვე არც კი მელაპარაკებოდა. თუმცა დიდხანს არ გაგრძელებულა ეს წინააღმდეგობა, ახლა ჩემს საგულშემატკივროდაც კი დადიან ჩემი ძმები.
– რთულია სამსახურისა და სპორტული კარიერის შეთავსება?
– რთული იმ შემთხვევაში იქნება, თუ რომელიმე იქნებოდა იძულებით ან ფინანსური უზრუნველყოფის მიზნით. ის, რისი გაკეთებაც გსურს ყოველთვის შესაძლებელია. არასოდეს მქონია განცდა, რომ რთულია ან შეუთავსებელი.
– როგორ ახერხებთ იყოთ ასეთი ქალური და მომხიბვლელი და ამავდროულად იყოთ დაკავებული სპორტის ისეთი სახეობით, როგორიც MMA-ია?
– პირველ რიგში, მე ქალი ვარ და მერე სხვა დანარჩენი. ქალი, იურისტი, თან MMA-ის მებრძოლი. ეს ჩემი გზა და არჩევანია. ვფიქრობ, თუ ყველაფერს სწორად მივყვები, ძალიან ბევრ სტერეოტიპს დავამსხვრევ და ბევრი ქალის ოცნებას ავასრულებ. როდესაც შენი თავი მოგწონს – როგორც გარეგნულად, ისე შინაგანად, პროფესიას უკვე მნიშვნელობა აღარ აქვს.
–თქვენი მიღწევების შესახებ გვიამბეთ…
– 2020 წლის თებერვალი – საქართველოს ჩემპიონი ორჭიდში. 2020 წელს ასევე ვიყავი რაგბში გოგოების გუნდის ლოკომოტივის წევრი. 2021 წლის მაისში – პირველი სარეიტინგო ბრძოლა ჩავატარე MMA-იში. ასევე 2021 წლის დეკემბერში – მეორე სარეიტინგო ბრძოლა. მოგებებით დასრულდა. 2022 წელს კრივში ორი სარეიტინგო ბრძოლა გავმართე ერთი საქართველოში, რომელიც მოვიგე და მეორე საფრანგეთში ქალაქ კანში, რომელიც წავაგე. 2023 წელს AJP -ის მიერ გამართულ ჯიუჯიცუს ღონისძიებებზე საქართველოში ორი ოქროს მედალი და ერთი ვერცხლის ავიღე. ჩავატარე gfc-ის სარეიტინგო ორი ბრძოლა MMA- იში, რომლებიც ასევე მოგებით დავამთავრე. 2025 წლის თებერვალი – საქართველოს ჩემპიონატი სამბოში მე-3 ადგილი.
– როგორია თქვენი თავის მოვლის რუტინა ?
– მიყვარს ბუნებრივობა, არ მიყვარს სილამაზის სალონებში სიარული, იშვიათად დავდივარ. ჩემს თმას ბევრს ვერ ვანდობ. ძალიან მიყვარს გაპრანჭვა, თუმცა უპირატესობას ყოველთვის სისადავეს ვანიჭებ, მაკიაჟსაც ძალიან მსუბუქს ვატარებ. მაქვს საკუთარი რუტინა სახის კანის და თმის მოვლის, რითაც ვისვენებ.
– რა დროს ატარებთ სავარჯიშო დარბაზში?
– თუ დღის განმავლობაში სამსახურში ან სამსახურის საქმეზე არ ვარ, დარბაზში ვარ. დარბაზში საშუალოდ დღეში 3 საათს ვატარებ, თუმცა მაქვს ასევე განტვირთვის დღეები. შრომაა საჭირო ყველაფრისთვის- ისე წარმატება არ მოდის. გარდა ამისა, ყოველთვის ვცდილობ, პროფესიული (იურიდიული) განათლება ავიმაღლო, რთულია, თუმცა სასიამოვნოც. შრომის პროცესი ყოველთვის მიყვარს და განსაკუთრებით შრომისგან მიღებული ნაყოფის მოწყვეტა, ყოველ ჯერზე, როდესაც წარმატებას ვაღწევ ვამბობ, რომ ეს ის ,,ტკბილი კენწეროა” , რომელზედაც ბავშვობაში გვიყვებოდნენ.
– რა არის თქვენი მიზანი?
– ჩემი მიზანია ჩვენი ქვეყნის სახელი გავიტანო ჩვენი ქვეყნის საზღვრებს გარეთ, ვასწავლო ქალებს, როგორ არის შესაძლებელი საკუთარი სურვილების ასრულება. მინდა ყველა ქალმა ისწავლოს რა არის ნამდვილი ბედნიერება და ის, რომ, თუ გვინდა ბედნიერები ვიყოთ ამისთვის შრომაა საჭირო. პირველ რიგში, უნდა გვიყვარდეს ღმერთი, უნდა გვქონდეს უფლის და საკუთარი თავის რწმენა და სიყვარული- მაშინ არანაირი სირთულე არ იქნება. მარტივია ყველაფერი ის, რასაც ჩვენ თავად არ გავართულებთ.
– რას ურჩევდით იმ ქალებს, ვისაც სურს ისეთი ნაბიჯის გადადგმა, რომელიც საზოგადოებაში არსებულ სტერეოტიპებს უპირისპირდება?
– პირველ რიგში, შეიყვარეთ საკუთარი თავი ქალებო, საკუთარ სურვილებს და ოცნებებს ეცით პატივი. ყოველთვის ეცადეთ საკუთარი თავი განავითაროთ, არ აქვს მნიშვნელობა რა პროფესია იქნება, თქვენს ხელშია თქვენი მომავალი. არავის მისცეთ უფლება აუსრულებელი დაგატოვებინოთ თქვენი ოცნებები. არასდროს შეაქციოთ ზურგი თქვენს სურვილებს. იყავით ბუნებრივები – ისეთები როგორიც ხართ.
ავტორი: თაკო ფიცხელაური
